Сабакі Эўропы

Трэцяя частка рамана "Сабакі Эўропы". Гісторыя, у цэнтры якой - спроба стварэньня "ідэальнай", утапічнай Беларусі. Беларусі як вострава - у прамым і пераносным сэнсе. Якую небясьпеку нясе нацыянальны праект, у аснову якога пакладзеныя архаіка, традыцыі і эзатэрыка - і як нацыяналізм абарочваецца фашызмам? Ці мае Беларусь зь яе вечным "адраджэньнем" шанцы ацалець у сучасным сьвеце, што супрацьстаіць зусім іншым выклікам? Ці можа бабка-шаптуха зрабіцца духоўным правадыром для прывіднага беларускага Туле? Такія пытаньні задае трэцяя частка кнігі - якая, паводле аўтара, ёсьць наўмысна створанай "багнай" для тых, хто выправіўся ў дарогу па лябірынтах "Сабакаў Эўропы", самым складаным выпрабаваньнем для "звышчытача".

Чацьвёртая частка рамана "Сабакі Эўропы", што вяртае чытача ў 2016 год. Сьпякотны летні дзень у Менску, дзіўны герой, што мае заданьне перадаць камусьці пакет зь невядомым зьмесцівам... Разам зь ім чытач блукае па вялікім горадзе, апынаючыся то на Праспэкце, то ля Камароўкі, то ў Мэтро, то на сталічных ускраінах, заходзіць у крамы і кнігарні, абедае вакзальным беляшом -- проста ўсярэдзіне экспрэсіянісцкага маналёгу, назіраючы за Менскам нібы з чужой чарапной каробкі і перажываючы крок за крокам эфэкт пазнаваньня.

Другая частка рамана "Сабакі Эўропы". Час дзеяньня -- 2049 год. Беларусь даўно зьнікла з мапы сьвету, зрабіўшыся часткай Вялікага Расейскага Райху. У вёсцы Белыя Росы-13 на ўскраіне імпэрыі, сярод лясоў і балот недалёка ад Вялікага Муру, дзіўны хлопчык па мянушцы Маўчун марыць пра ўцёкі. Нечаканая сустрэчы ў лясным гушчары зьмяняе ягонае жыцьцё назаўсёды. Фантастычная гісторыя, у якой паўночнаэўрапейская казка адгукаецца ўсходнеэўрапейскай сатырай. Антыўтопія, якая пасьля 2022 году імкліва робіцца нашай рэальнасьцю.

Першая частка рамана "Сабакі Эўропы", дзеяньне якой адбываецца ў 2016 годзе. Менскі няўдаліца, самаабвешчаны геній і мізантроп стварае бальбуту -- таемную мову свабоды. Дэтэктыўная гісторыя пра моўную ўтопію і роспач індывідуальнага бунту ў пазнавальных дэкарацыях беларускай сталіцы напярэдадні вялікіх і трагічных падзей...