ਕਥਿਹੁ ਅਕਥ ਕਹਾਣੀ

ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਇੱਕ ਐਸਾ ਅਦੁੱਤੀ ਧਰਮ ਗ੍ਰੰਥ ਹੈ ਜਿਸ ਵਿੱਚ ਪ੍ਰਮਾਤਮਾ ਅਤੇ ਪ੍ਰਮਾਤਮਾ ਦੇ ਵਿਧੀ ਵਿਧਾਨ ਬਾਰੇ ਬੜੀ ਸਪਸ਼ਟਤਾ ਨਾਲ ਸਮਝਾਉਂਦਿਆਂ ਸਾਨੂੰ ਦੱਸਿਆ ਗਿਆ ਹੈ ਕਿ ਇਸ ਦੁਨੀਆ ਵਿੱਚ ਰਹਿੰਦਿਆਂ ਕਿਵੇਂ ਸਫ਼ਲ ਅਤੇ ਸੁਚੱਜਾ ਜੀਵਨ ਬਤੀਤ ਕਰਨਾ ਹੈ। ਗੁਰੂ ਗ੍ਰੰਥ ਸਾਹਿਬ ਵਿੱਚ ਬਿਆਨ ਕੀਤੀ ਗਈ ਅਕੱਥ ਦੀ ਕਹਾਣੀ ਅਨੁਸਾਰ, ਅਸੀਂ ਸਾਰੇ ਕਰਤਾ ਪੁਰਖ ਦੇ ਰਚੇ ਹੋਇ ਇੱਕ ਬੜੇ ਅਸਚਰਜ ਖੇਲ ਦੇ ਪਾਤਰ ਬਣ ਕੇ ਦੁਨੀਆ ਵਿੱਚ ਆਏ ਹਾਂ। ਇਹ ਖੇਲ ਪਰਮਾਤਮਾ ਦੇ ਹੁਕਮ ਜਾਂ ਵਿਸ਼ੇਸ਼ ਨਿਯਮਾਂ ਅਧੀਨ ਹੈ। ਆਪਣੇ ਕੀਤੇ ਕਰਮਾਂ ਅਨੁਸਾਰ ਅਸੀਂ ਆਪਣਾ ਭਵਿੱਖ ਆਪ ਚਿਤਰਦੇ ਹਾਂ। ਮਨੁੱਖੀ ਜੀਵਨ ਦਾ ਇੱਕ ਮੂਲ ਮਕਸਦ ਇਸ ਖੇਲ ਦੇ ਕਰਮ-ਬੱਧ ਜਨਮ-ਮਰਨ ਦੇ ਗੇੜ ਵਿੱਚੋਂ ਨਿਕਲ ਕੇ ਵਾਪਿਸ ਆਪਣੇ ਸਦੀਵੀ ਘਰ ਪਰਮਾਤਮਾ ਪਾਸ ਜਾਣਾ ਹੈ। ਐਸਾ ਤਾਂ ਹੀ ਹੋ ਸਕਦਾ ਹੈ ਜੇ ਸਾਨੂੰ ਇਹ ਸਮਝ ਪੈ ਜਾਵੇ ਕਿ ਪਰਮਾਤਮਾ ਵਾਕਈ ਹੈ ਅਤੇ ਵਾਪਿਸ ਘਰ ਜਾਣ ਦੀ ਇੱਛਾ ਪ੍ਰਬਲ ਹੋ ਜਾਵੇ।